潤牛麵??

今日同老公去維記飲下午茶時遇到以下趣事.

我地坐低後叫咗一杯凍奶茶同凍嫣鴦加一份加央西多. 另外同枱的3對情侶亦分別同阿姐order. 過程中阿姐係無用紙仔寫底. 我亦暗暗欽佩阿姐可以有能力背下我地8個人的不同order.
話口未完, 阿姐拿來兩杯啡色凍飲,然後放低响一對情侶前

阿姐: 凍奶茶, 凍嫣鴦
情侶A: ee...我地無叫野飲喎
阿姐: 無?? 無咩? 咁邊個架? (其實應該係我地o羅)

轉頭阿姐端上一碗麵, 放低响情侶A前
阿姐: 餐腸麵
情侶A之男: 我叫餐旦麵架
阿姐: 唔係呀, 我聽到你叫餐腸麵喎
情侶A之男: 咩呀?一碗餐旦麵，一碗腸旦麵吖麻
阿姐:　．．．幫你換

又過一會阿姐端上另一碗麵, 放低响情侶B前
阿姐: 潤牛麵
情侶B之女: 我無叫潤牛麵喎
阿姐: 我知你唔係叫潤牛麵，但佢(指著女的男朋友)要潤牛麵吖麻
情侶B之女: 唔係呀, 係牛米呀．
阿姐: 咁佢叫牛米, 你叫潤牛麵ｏ羅
情侶B之女(開始有ｄ想發爛) :你唔記得都唔好屈我喎，我地淨係叫咗一碗牛米咋喎
情侶ｃ之男見狀就曰: 呀, 潤牛麵我架我架....eee....唔係 (然後問佢女朋友) 我叫咗咩呀??
情侶ｃ之女: 吓, 唔係你叫潤牛米呀, 我叫腸牛麵咩?
阿姐: ......好好換過, 換過

再來, 阿姐換來一碗淨牛麵
全枱人: ...........
唔係阿姐又記錯，只係我地所有人都俾阿姐攪到唔記得自己叫咗ｄ咩